منشور السلام عليكم يا بشمهندس محمد عامل إيه يا رب تكون بخير

السلام عليكم يا بشمهندس محمد عامل إيه يا رب تكون بخير أنا يوسف مسعود من مصر طالب في كلية تربية رياضية السنة الثالثة.. بجد بقالي فترة كبيرة نفسي أكتبلك الرسالة دي وكل مرة أقول هبعت وهحكيلك رحلتي وبعدين أنسى أو أأجل بس المرة دي قلت لازم أكتب ومستناش أنا بدأت رحلتي مع البرمجة من شهر 8 سنة 2023 وقررت أمشي على خارطة الطريق لحضرتك خطوة خطوة من غير ما أشتت نفسي كنت بذاكر حرفيًا من الصفر ومكنتش فاهم كتير في الأول بس كنت ماشي ورا كل فيديو وكل نصيحة حضرتك بتقولها خليني أكون صريح معاك البداية كانت صعبة جدًا كان معايا لابتوب إمكانياته ضعيفة بشكل مش طبيعي لدرجة إن أي كود بسيط جدًا أكتبه في الكونسول كان ممكن يقعد دقيقتين عشان يرن الموضوع كان صعب جدًا بس قررت إني مش هقف عند النقطة دي وهكمل لحد ما أجيب جهاز تاني كنت بمشي في الكورسات واحدة واحدة وبطبق بإيدي حتى لو الموضوع بياخد وقت أطول من الطبيعي بسبب الجهاز فضلت مكمل لحد ما وصلت للكورس 14 وساعتها جبت جهاز جديد بعدها بدأت أذاكر بشكل أسرع وأركز أكتر وكملت باقي الخارطة وتقريبًا دراسة الخارطة كلها قعدت فيها سنة ونص وبعدين اشتغلت على نفسي أكتر في الفرونت إند وراجعت الحاجات اللي كانت ناقصاني في الباك إند عشان أكون فاهم الصورة كاملة مكنتش مستعجل على النتيجة بس كنت مستمر ودي يمكن أهم حاجة اتعلمتها من الرحلة كلها بعد ما حسيت إني بقيت جاهز شوية بدأت أجرب الفري لانس واشتغلت فترة كويسة أخدت فيها خبرة حقيقية من السوق واتعلمت إزاي أتعامل مع clients وإزاي أحل مشاكل بجد مش مجرد تدريب وبفضل ربنا قدرت أتوظف في شركة startup وأنا دلوقتي شغال بقالي 8 شهور كـ Full Stack Developer وبطور من نفسي كل يوم الحمد لله أنا حابب أقول لحضرتك إن خارطة الطريق بتاعت حضرتك مكانتش مجرد كورسات بالنسبة لي دي كانت دليل ماشي عليه وشخصية حضرتك وأسلوبك معانا فرق معايا في جوانب كتير في حياتي بعيدًا عن البرمجة حضرتك اختصرت عليا وقت ضخم جدًا وخلتني ماشي في الاتجاه الصح من غير ما أضيع سنين في لف ودوران يمكن أنا واحد من ناس كتير جدًا استفادت منك بس بجد أنا ممتن ليك بشكل كبير جدًا ومش هنسى إنك كنت سبب بعد ربنا في إن حياتي تتغير بالشكل ده ربنا يجازيك كل خير يا بشمهندس ويباركلك في علمك وتعبك ❤️