منشور بالنسبة لسالفة اللي يبي يخطب

بالنسبة لسالفة اللي يبي يخطب أتفهم إن مو منطقي نتوقع من شخص معجب بوحدة إنه فجأة يقدر يجيب رقم أبوها أو أحد من أهلها، خصوصًا إذا ما فيه أي معرفة سابقة بينهم وحتى لو قدر مااحس منطقي اشوف كإننا كبار وواعين وناضجين، وخصوصًا لو كنا في بيئة عمل، ما فيها شيء لو الشخص أرسل للبنت بكل احترام ووضوح وقال لها: «يا بنت الحلال، أنا معجب فيك ونيتي جدية، وودي أتقدم لك وأدخل البيت من بابه، فإذا ما عندك مانع ممكن تعطيني رقم الوالدة عشان أمي تتواصل معها؟ وإذا الموضوع ما يناسبك، أحترم قرارك تمامًا، ولا يحتاج حتى تردين» إذا كان فيه قبول من طرفي، كان بها، أعطيه رقم الوالدة عشان أمه تتواصل معها، أو حتى رقم الوالد إذا هذا اللي يناسبني، وبعدها هو يدبر الموضوع بالطريقة الرسمية اللي تناسب الأهل. أما إنه يروح من وراي ويحاول يجيب رقم أبوي أو أحد من أهلي، صراحة أشوفها خطوة محرجة وغير ضرورية، خصوصًا إنه ما يدري أصلًا إذا فيه قبول من طرفي أو لا وإذا ما كان فيه قبول أو إعجاب متبادل، خلاص ينتهي الموضوع بيننا بكل احترام، من غير ما يدخل الأهل في شيء من البداية، ولا يصير فيه إحراج أكبر من اللازم وطبيعي جدًا إن لو البنت رفضت ممكن يصير فيه إحراج بينهم بعدين، خصوصًا لو كانوا زملاء عمل، بس بالنهاية هذي سنة الحياة، مو كل إعجاب لازم يكون متبادل، ولا كل محاولة تنتهي بقبول. وأشوف إن طالما الشخص كان محترم وواضح في نيته، وتقبّل الرفض وما كرر المحاولة، ما فيها أي تقليل من قدره أو قدرها يعني إذا البنت أعجبته ونيته فعلًا الزواج، ليش يضيّع على نفسه فرصة ممكن تكون من نصيبه، بس لأنه خايف من الإحراج؟