Message2026-yildan keyin dasturchiga talab bormi?

2026-yildan keyin dasturchiga talab bormi? Hozirda sun'iy intellekt (SI) va uning agentlari rivojlangani sayin dasturlash ishlarining hammasini o'zi bajarayotgandek go'yo. Vibe coding orqali umuman dasturlashni bilmaydiganlar ham o'zlarining dasturlarini tezda yaratishmoqda. Ammo, shu nuqtada bir savol tug'iladi, bu dasturlar qanchalik "yaxshi"? Bu yaratilayotgan dasturlarga baho berish uchun Vibe coding nima ekanligini tushunishimiz kerak. Vibe coding (vayb koding) – bu dasturlash kodini o‘zingiz yozmasdan, sun’iy intellektga (AI) shunchaki oddiy tilda nima xohlayotganingizni tushuntirish orqali dastur yaratish uslubidir. Bu atama dasturlash dunyosida ommalashib borayotgan yangi trend hisoblanadi. Bunda siz kod sintaksisi, xatolar yoki texnik sozlamalar haqida qayg‘urmaysiz. Sizning asosiy vazifangiz – g‘oya berish, loyihaning umumiy "kayfiyati" (vibe) va dizaynini boshqarish hamda natijani tekshirish. Misol sifatida tasavvur qiling, siz uy qurdirmoqchisiz va sizda aqlli, arzon, tez ishlaydigan, sohasini ancha chuqur tushunadigan quruvchilar jamoasi bor. Lekin, siz arxitektor emassiz. Siz quruvchiga qurmoqchi bo'lgan uyingizning talablarini aytasiz: chiroyli bo'lsin, mustahkam bo'lsin, mehmonlarni qabul qilishga qulay bo'lsin (o'zbekmiz axir, mehmonni o'ylamay bo'ladimi?), qishda issiq, yozda salqin bo'lsin va hokazo. Quruvchi "xo'p" deb ishni boshlaydi. Ish borgan sari qizigandan qizib, bir necha minutda uyingiz deyarli tayyor bo'ladi, kattaroq uy bo'lsa bir necha 10 daqiqada. Tayyor uyni qarasangiz, u haqiqatan ham chiroyli, shinam, siz aytgan qulayliklarga ega. Bu juda ham ajoyib, to'g'rimi? Tezda uydan foydalanishingiz mumkin. Endi uyga kirib yashashni boshladingiz. Vaqt o'tib sal qattiqroq shamol bo'ldi va uyingizning shiferi uchib ketdi yoki hatto qulab tushdi. Siz hayronsiz. Birozdan keyin kuchli yomg'ir bo'ldi, uyingiz tomidan chakka o'ta boshladi. Mehmonlar kelganida ularning ichida "qitmirrog'i" bor ekan, devorga bir urib ko'rgan edi mustahkamligini tekshirish uchun, devor yorilib, teshilib, qulab tushdi. O'sha mehmon yaxshilab qarasa, devor juda zaif, burchaklarida, tomlarida va boshqa joylarida ko'plab oddiy odamga sezilmas zaif joylar bor, hatto eshik yaxshi qulflanmaydi. Siz hozir "bunchalik emasdir, oddiy uy qurishni hamma eplaydi-ku" dersiz, lekin ko'pchilik uylar standartlarga to'la javob bermaydi. Xohlasangiz, izlanish o'tkazib ko'ring. Yuqoridagi misoldan nima xulosa qilish mumkin? Siz uyni o'z qo'lingiz bilan qurmasangiz-da, quruvchining to'g'ri ish qilayotganini yoki qayerda xato qilayotganini nazorat qila oladigan darajada chuqur bilimga ega bo'lishingiz kerak. Kichik-kichik xatolarga e'tibor bermasangiz, kelajakda katta muammolar kelib chiqishini tushunadigan darajada fikrlay olishingiz kerak. Bo'lmasa, umringiz qurgan uyingizni qayta qurish, ta'mirlash, mustahkamlash bilan o'tib ketishi mumkin. Dasturlashda ham endi shunaqa. Siz dasturlashni faqat kod yozish (qurish) uchun o'rganmang, balki agentlarni to'g'ri boshqara olish, loyihani to'g'ri rejalashtira olish, agentlar arxitekturadan chetga chiqmayotganini tushunish kabilar uchun o'rganing. Kodlarni agentlar yozadi. Dasturlash kasbi endi oddiy kod yozish emas, muhandislikdir. Bu degani umuman kod yozishni bilish shart emas degani emas, kod yozish siz uchun shunchaki "zerikarli" bo'lishi kerak. Demak, dasturlashni endi quyidagilar uchun o'rganing: ✅ Fikrlashni oshirish (dasturlash katta foyda beradi) ✅ Loyihani to'g'ri boshqara olish (ishga kirmoqchi bo'lsangiz) ✅ Olimpiada, attestatsiya, bellashuvlar uchun ✅ O'zingizning mustaqil ishlaringiz uchun 👨🏻‍💻 Muallif: Habibulloh Xalilov Amaliy matematik va informatik, senyor dasturchi, dasturlash bo'yicha olimpiada va attestatsiya bo'yicha onlayn murabbiy 📧 Telegram: @pythoncoderh Endi siz suniy intelektdan qaysidir tomonlama kuchli bo'lmasangiz kuchlilar bilan raqobatlashasiz. Bu hamma sohaga tegishli!