منشور قبل ما نبلش بشرح مادة العلوم

قبل ما نبلش بشرح مادة العلوم حابين نحكي شوي عن طريقة التعامل مع المادة وهي النقطة الأهم لأنو العلوم مو مادة بتنحفظ وخلص إذا عرفنا من البداية كيف لازم ندرسها رح نختصر على حالنا كتير تعب ونوصل لنتيجة أقوى بإذن الله 📌أول شي لازم تعرفوه إنو مادة العلوم بتعتمد على "الفهم" قبل الحفظ يعني ما بدنا منكن تحفظوا المعلومة أول ما تسمعوها، افهموا الفكرة واعرفوا ليش صارت وكيف صارت وشو العلاقة اللي وصلتنا لهالمعلومة وبعد ما تثبت المعلومة براسكن بيجي دور الحفظ 📌منجي لمرحلة الحفظ كمان ما رح يكون الحفظ عشوائي حاولوا تربطوا المعلومات ببعض وتعملوا تسلسل منطقي للدرس، قسموا الفقرات لأفكار صغيرة، ركزوا على الكلمات المفتاحية والمصطلحات المهمة، وبعدها جربوا تسكروا الكتاب وتحكوا المعلومة من ذاكرتكم بدل ما تضلوا تقروها عشر مرات لأنك لما تقرأ المعلومة بتحس إنك حافظها، بس لما تسكر الكتاب وتحاول تسترجعها هون بتعرف فعلاً إذا ثبتت معك أو لا 📌وهون بيجي دور التسميع التسميع مو خطوة إضافية نعملها إذا كان معنا وقت، بالعكس هو جزء أساسي من دراسة العلوم سمّعوا لحدا من أهلكم، لرفقاتكن أو حتى سمّعوا لحالكن بصوت عالي المهم إنك تطلع المعلومة من راسك بدون ما تكون عم تطلع عليها وإذا وقفت عند معلومة أو نسيتها لا تعتبرها فشل، بالعكس هون أنت اكتشفت النقطة اللي بدها تثبيت ورجعت عالجتها 📌بالنسبة للأسئلة والنماذج، ما بدنا تكون علاقتكم مع النموذج إنكن تحلوه وبس تعرفوا العلامة النموذج هو وسيلة حتى نكتشف مستوانا وأخطاءنا حلوا النموذج بالبداية بدون ما ترجعوا للكتاب، وبعدها راجعوا إجاباتكم، وكل غلطة وقعتوا فيها لازم تعرفوا سببها هل لأن المعلومة مو محفوظة؟ ولا لأنكم ما فهمتوا الفكرة؟ ولا لأنكم استعجلتوا بالسؤال؟ ولا لأنكم ما انتبهتوا لكلمة معينة؟ وضروري كتير بهي المادة بالذات نعرف من وين عم نحل نماذجنا بدي منكن تختاروا المصدر الموثوق والصح لانو اي غلط بالنموذج يؤدي إلى شعور بالشك بحفظكن 📌اعملوا دفتر أو علامة خاصة عالكتاب لأخطائكم، وكل فترة ارجعوا راجعوا هالأخطاء، لأن الغلطة اللي بتتكرر أكتر من مرة لازم تتحول لنقطة تركيز عندكن 📌 لا تنتظروا فترة المراجعة النهائية حتى تبدؤوا بحل النماذج مع كل درس عم ناخده، حاولوا تطبقوا عليه وتحلوا أسئلة، ومع الوقت رح تلاحظوا إن طريقة الأسئلة صارت مألوفة بالنسبة إلكن وصرتوا تعرفوا كيف تفكروا بالسؤال بدل ما تعتمدوا على الحفظ فقط 📌وأهم نقطة بدنا نقلكن ياها لا تقيسوا دراستكن بعدد الساعات اللي درستوها، قيسوها بقديش المعلومة صارت ثابتة وقديش قدرتوا تسترجعوها وتحلوا عليها ومرة على مرة ح تلاقوا مستواكن بالمادة كتير تحسن نحنا هون رح نمشي مع بعض خطوة بخطوة فهم، ثم تثبيت وحفظ ثم حل أسئلة ونماذج، ثم مراجعة الأخطاء وإعادة تثبيت النقاط الضعيفة وإذا التزمنا بهالطريقة من بداية السنة، ما رح يكون هدفنا بس نخلص المنهاج هدفنا نخلصه ونحن فاهمينه ومثبتينه وقادرين نحل عليه بكل أشكال الأسئلة العلامة الكاملة مو مستحيلة، بس بدها طريقة دراسة صحيحة واستمرارية وانتباه للتفاصيل ونحنا من أول درس رح نشتغل سوا على هالشي، خطوة بخطوة، لنوصل بالنهاية للهدف اللي بدنا ياه 300/300 بإذن الله ❤️‍🔥 ووعد مننا إلكن اذا مشيتوا معنا بدون تراكم ح تجيبوها شدوا الهمة من هلأ، وخلو دخولكن على السنة مختلف مو ندرس وبعدين نشوف شو بيطلع معنا من البداية بدنا نعرف شو عم ندرس، كيف عم ندرسه، وليش عم ندرسه وبإذن الله كل تعب رح تشوفوا نتيجته بالعلامة اللي بتستاهلوها ♥️