استغفر الله نقولو ربي ساخطنا ومتصبش علينا المطر وتصحر وهي تصب ساعة تدير فينا هكي بدل ما تكون خير لانها نفع نخلوها بلاء بسبب التأخر في البنية التحتية وتقعد الناس تنق وحني ننقو وتنقطع معش تصب علينا شهر وشهرين
بالله لأمتى الوضع هذا؟ الواحد اعيي حتى يتكلم لأنه نفس الهم في كل ظرف يصير
ليهم أسبوع متوقعين الطقس، علاش للساعة 10 بعد ما اوريدي بدوا زوز محاضرات تتعلق الدراسة وقتها
أما تعليق هذا؟
الدكاترة جو، الموظفين جو، الطلبة جو
والمشكلة مش في تشحيطتنا ودرة كانا عليها
لكن المشكلة في انك لما تجيني الـ 10 ونص تقولي تم تعليق الدراسة هكي تحساب روحك درت اللي عليك ودرتلي حل!
باهي المحاضرات إلتغوا وأني قعدت حاصل لنهاية الدوام في الكلية واماليا 4 ساعات متشحطين في الطريق باش قدروا يوصلوا فيا وغيري أكثر
هذا من غير رحلة المرواح
واللي يجي في تاكسي ولا مواصلات عامة قعد حاصل
واللي جاي بسيارته اللي مفروض بلاه أخف من غيره برضو مسلمش
تعرفوا كم شخص اليوم يسوق وفجأة سيارته بدت اطلع في دخان ولا انضربتله حاجة ووقفت بيه في الطريق ؟
ولا كم واحد لتوا عالق في الطريق ويعلم الله امتى بيوصل لحوشه؟ ولا ادارة الكلية المحترمة تحسابنا نسكنوا في عمارات الجامعة كلنا، حدفة عصا نوصلوا ؟
واللي اتنقع اليوم وبيصبح مريض ويعلم الله بصحتنا مع اللي عشناه اليوم ولو تغيب حتى بحجة مريض مايرحموكش ولا يعبروك؟
الدكاترة اللي عطوا اليوم الصبح هادوا من بيقنعهم يرحموا الطلبة اللي مقدروش يجوا بسبب الطقس واللي في منهم طالعين من حياشهم والمطر بدت تصب وعلقوا ؟
قداش من الاستهزاء بينا وبعائلاتنا وبصحتنا ورزقنا؟ أكبر جامعة في البلاد معقولة مش قادرة تاخد قرار قبل أي كارثة؟؟؟ لازم يصير الحدث وننضروا قبل؟
لأمتى حنتحملوا المعاملة غير الآدمية اللي قاعدة تتوجهلنا؟
سبحان الله! في ساعات، بل في دقائق، تتبدّل أحوال البلاد والعباد!
طرق تغرق، وبيوت يدخلها الماء، وسيارات تتضرّر، وناس تخسر تعب سنين في لحظات… وحاجات كانت قبل ساعات من المسلّمات، ولت اليوم أمنيات صعبة على أصحابها!
سبحان من يورّينا في لحظة قداش إحني ضعاف، وقداش الدنيا هذه ما فيها شي مضمون إلا بمشيئة الله.
مش المطلوب نجزموا إن اللي صار عقوبة لكن المطلوب نعتبروا ونراجعوا روحنا ونعرفوا إن الرجوع لربّي مش وقت الشدّة بس، وإن التوبة ما تستناش المصايب، وإن الحرام والظلم والربا ذنوب ما يجوزش نتهاونوا بيها.
ما تغرّناش النعم، وما نخلوش العِبر تمرّ قدّامنا من غير ما تغيّر فينا شي.
اللهم احفظ ليبيا وأهلها، وارحم المتضرّرين، وعوّض كل من خسر، واجبر قلوبهم، واجعلها أمطار خير ورحمة، وردّنا إليك ردًّا جميلًا.
التايم لاين ليش هكي؟
بوستات التفاهة وعراك التخصصات وتصويت المسابقات يطلعك أول بوست
لكن أخبار الكارثة اللي عشناها مهناش!!!
محدش مستوعب حجم اللي مرينا بيه لأنه مش قاعدين يشوفوا في الوفايات والمفقودين والرزق اللي ضاع
متخلوش الدنيا تلهيكم بالتفاهة، معرفة الحقيقة يخليكم تحسوا ويخليكم بشر، هذا دليل انسانيتكم
والمؤمن لما تنزل عليه مصيبة يذكر الله ويصبر ويتأمل فيها ويستشعر صغره قدام الله وقدرته
مش يفوتها ويقعمز يصوّت لأفضل طباخ وأفضل تخصص!!
للعلم راهو البنزينة متخلطة بالمية في الشيلات واكثر من شخص عبى وسيارته انضربت
اللي محتاج يعبي يحاول يعبي من اماكن مصبتش عليها المطر اولامس
زي تاجوراء وجنزور والمناطق الحدودية
اعطوا علم لبعضكم وخلاص الله غالب علينا
مدام مفيش حد يبي يتكلم
شن الاجراءات الي يديرو فيها قبل باش يأجلو؟ في حد معين يكلمو فيه او تتواصلو معاه قبل ما تحطو ورقة توقيعات ؟ لازم يكون من الاتحاد او اي طالب من الكلية يقدر ؟