Bellit.info Chat

📖 Паэт і перакладчык Ігар Кулікоў запусціў свой сайт. Паэт і перакладчык Ігар Кулікоў запусціў сайт “Княства мовы”, дзе сабраў інфармацыю пра сваю творчую дзейнасць, бібліяграфію, спасылкі на продаж кніг. Таксама больш за дзясятак яго кніг і перакладаў выкладзеныя ў вольны доступ для чытання. Падрабязней ⬅️

💿 Пісьменнік Макс Шчур выдаў музычны альбом. На стрымінгавых платформах з'явіўся альбом сольнага праекта паэта і барда Макса Шчура «Паддашша» пад назвай «20+ запісаў, якім 20+ гадоў». У альбом увайшлі акустычныя версіі песень аўтара, запісаныя ў 2005 годзе ў хатніх умовах і рэканструяваныя з дапамогай ШІ. Жанр песень сам аўтар азначае як «кухонна-інтэрнацкі андэграўнд», часам як акустычны панк-фолк. Альбом спалучае DIY-эстэтыку з эмацыйнасцю і гумарам. Падрабязней 👈

У новым выпуску падкаста "Літаратурныя зацемкі" Сяргей Дубавец згадвае першую публікацыю апавядання польскага пісьменніка Мар'яна Брандыса "Каралеўства Беларусь" — і што з гэтага выйшла. "Нязвыклай была сама тая гісторыя, але зусім незвычайнай была назва. Мы так Беларусь ніколі, здаецца, і не называлі і ў сур’ёзнага пісьменьніка гэты брэнд гучаў настолькі ж нечакана, наколькі прывабна. Словам, апавяданьне стала важнай публікацыяй для ангажаванай беларускай публікі". ✍️ Выпуск даступны ў звыклым аўдыяфармаце, а таксама ў тэкставай версіі. Слухаць і чытаць ⬅️

📘 Выдавецтва "Тэхналогія" ўключылі ў спіс "экстрэмісцкіх арганізацый". Адпаведны запіс з'явіўся ў пераліку "экстрэмісцкіх фарміраванняў", які вядзе МУС. З яго вынікае, што “НВК “Тэхналогія” быў прызнаны экстрэмісцкай арганізацыяй Эканамічным судом Мінска 10 чэрвеня. У пералік пазіцыя была дададзена сёння. У красавіку гэтага года Мінінфарм прыпыніў дзеянне пасведчання распаўсюджвальніка друкаваных выданняў "Тэхналогіі". Нагадаем, у лютым у Мінску прайшлі масавыя затрыманні выдаўцоў і распаўсюджвальнікаў кніг. Сярод іншых былі затрыманыя заснавальнік выдавецтва "Тэхналогія" Вацлаў Багдановіч, ягоная жонка Алена і дачкі Антаніна і Вікторыя. Пазней усіх, акрамя Вікторыі Багдановіч, вызвалілі. Таксама быў затрыманы галоўны рэдактар ​​выдавецтва Зміцер Санько. 📖 Выдавецтва "Тэхналогія" было заснавана ў 1988 годзе і стала першым прыватным выдавецтвам у Беларусі. Спецыялізавалася на выданні навукова-папулярнай літаратуры, даведнікаў, дзіцячых кніг, друку календароў і іншай папяровай ды сувенірнай прадукцыі.

📓Выдавецтва hochroth Minsk выдала вершы Лізы Херэш. У берлінскім выдавецтве hochroth Minsk выйшла кніга Лізы Херэш з назвай “Дни вповалку”, вершы ў якой звернутыя да Мінска і Беларусі. “Паэтка размаўляе з Мінскам на нейкай новай мове, на мове здзіўлення, як размаўляла з Менскам на ідышы амаль сто гадоў таму Сорэ Коган, адзіная жанчына-паэтка ў яўрэйскай секцыі Беларускага саюза пісьменнікаў", — піша выдавец Дзмітрый Строцаў. Падрабязней 👈

Перавыдаецца аўтабіяграфія Быкава Выдавецтва “Камунікат” анансавала перавыданне мемуараў Васіля Быкава “Доўгая дарога дадому”. Да канца жніўня можна перадзамовіць кнігу са зніжкай праз анлайн-кнігарню Kamunikat.shop. “Доўгая дарога дадому” — адна з самых асабістых кніг Васіля Быкава. Гэта не проста мемуары, а шчыры і глыбокі расповед пра жыццё чалавека, чый лёс прайшоў праз галоўныя выпрабаванні мінулага стагоддзя. Ад вясковага дзяцінства на Віцебшчыне — праз перадваенныя гады, вайну, раненні, пасляваенную службу, Горадню, літаратурнае станаўленне, драматычныя сутыкненні з сістэмай — да развагаў пра Беларусь, мову, свабоду, памяць і адказнасць пісьменніка перад сваім часам. Падрабязней

Выходзіць новая паэтычная кніга Сержука Ляснога Паэт анансаваў выхад зборніка з назвай “79 прыступак Віталя і птушкі на падваконні”. Сам аўтар называе сваю кнігу нечаканай, у ёй ён “пільна ўглядаецца ў ландшафт тыповага пад’езда тыповага ўскраіннага шматпавярховіка, узлятаючы на крылах натхнення да самага яго пабеленага паднябесся, адначасова зазіраючы праз запыленую шыбіну, а часам лунаючы з чайкамі і свіргулямі на недасяжных воку вышынях, з якіх ён — зоркі і чулы назіральнік — сочыць, асэнсоўвае і аздабляе адзін самотны, шэры, горкі лёс”. Падрабязней

Наста Кудасава выпраўляецца ў восеньскі паэтычны тур Паэтка Наста Кудасава і выдавецтва “Камунікат” наведаюць Прагу, Браціславу, Цюрых, Вену, Берлін з прэзентацыямі новай кнігі “Лірыка”. Гэты зборнік — сёмая паэтычная кніга аўтаркі і трэцяя з выдадзеных у эміграцыі. Менавіта “Лірыка” стане адным з галоўных пунктаў вераснёўскіх сустрэч з чытачамі. Паглядзець расклад