Ватсапп орқали тарқалаётган хабарларга кўра, Россияда кенг кўламли мобилизация эълон қилиниши кутилмоқда.
Москавада автомобил устаси бўлиб ишлаётган ўзбек болага мижози - ҳарбий одам ўзаро суҳбатда бундай деган:
“1 сентябргача 1 млн 200 мингта одам йиғишимиз керак. Ҳали бу ҳақда ҳеч қаерда расман эълон бермадик. Аввал барча чегаралар ёпилади, кейин умумий ҳарбий чақирув бошланади. Ҳарбий учетда турган ва турмаганини, йўқ бўлса учетга қўйдириб бўлса ҳам олиб кетамиз. 60 ёшгача умумий мобилизация бўлади. Аввалги мобилизацияларда чегаралар очиқ бўлгани учун, кўпчилик қочиб чиқиб кетган эди. Энди эса чегаралар тўлиқ ёпилади. Ростовда мобилизация бошланди, Москавага узоғи билан икки ҳафтада етиб келади. Савдо марказлари, такси ва бошқа жойларда рейдлар ўтказилиб, уч ҳафта давом этади”.
Бу гапни Россияда ишлаётган яна бошқа бир ўзбек ҳам тасдиқлаган.
“Бу ҳақда 20 кунча аввал эшитдик. Одамларга чақирув қоғозлари келяпти, кўп танишларга келди. Бир – икки танишларимнинг ўғиллари армияда хизмат қилиб келганди, уларга чақирув қоғозлари биринчи келди. Йиғим терим бошланди. Бошқа вилоятларда қандай билмадим, лекин Челябин билан Екатерингбургда жуда кўпини териб кетибди”.
Бу мобилизацияда Россиядаги мигрантларнинг кўпи ҳарбий хизматга чақирилиши мумкин. Айниқса, яқинда Госдума депутати Сергей Мироновнинг мигрантлар бўйича қилган кескин баёнотидан кейин назорат янада кучайтирилиш эҳтимоли бор.
