accessible Tech vision
نحمدہ ونصلّی علیٰ رسولہ الکریم، امّا بعد!
فاعوذ باللہ من الشیطان الرجیم
بسم اللہ الرحمن الرحیم
معزز اساتذہ کرام، قابلِ احترام مہمانانِ گرامی اور میرے پیارے ساتھیو!
السلام علیکم ورحمۃ اللہ وبرکاتہ!
میں افتاب علی، اپنے تمام باہمت بصارت سے محروم بھائیوں، بہنوں اور 'CSR Experts' کے پورے خاندان کی طرف سے آپ سب کی خدمت میں دلی احترام پیش کرتا ہوں۔
شاعر نے کیا خوب کہا ہے:
نہیں ہے ناامید اقبال اپنی کشتِ ویراں سے
ذرا نم ہو تو یہ مٹی بڑی زرخیز ہے ساقی
معزز حاضری!
آج 15 اکتوبر کا یہ خاص دن ہمیں یہ سکھاتا ہے کہ انسان کا وجود اس کی بصارت کا مرہونِ منت نہیں، بلکہ اس کی بصیرت اور اس کے جذبوں کا آئینہ دار ہے۔ ہم جب سڑک پر سفید چھڑی لے کر نکلتے ہیں، تو یہ سفید چھڑی صرف ایک سہارا نہیں ہوتی، بلکہ یہ ہماری عزت، ہمارے وقار اور ہماری خود انحصاری کی علامت بن کر دنیا کو ہماری موجودگی کا احساس دلاتی ہے۔
بطورِ ایک بصارت سے محروم فرد، میں نے ہمیشہ یہ خواب دیکھا کہ ہماری کمیونٹی صرف معاشرے کے قدم سے قدم ملا کر نہ چلے، بلکہ ٹیکنالوجی کے اس دور میں سب سے آگے رہے۔ اسی سوچ کے تحت ہم نے 'CSR Experts' کا پلیٹ فارم قائم کیا۔ ہمارا مقصد یہی ہے کہ ہم اپنے ہر بلائنڈ بھائی اور بہن کو جدید اسسٹو ٹیکنالوجی، سمارٹ فونز، سکرین ریڈرز اور ڈیجیٹل ہنر سے آراستہ کریں تاکہ وہ تعلیم ہو، روزگار ہو یا زندگی کا کوئی بھی میدان—کسی کے محتاج نہ رہیں۔
جب ایک ہاتھ میں سفید چھڑی ہو جو زمین کی ناہمواریوں سے بچائے، اور دوسرے ہاتھ میں ٹیکنالوجی کی طاقت ہو جو دنیا بھر کا علم اور مواقع آپ کے سامنے کھول دے، تو پھر تاریکی کا نام و نشان بھی باقی نہیں رہتا۔
حکیم الامت علامہ اقبالؒ کے اس پیغام کو ہمیشہ یاد رکھیں:
پیوستہ رہ شجر سے، امیدِ بہار رکھ!
میرے پیارے دوستو!
معذوری کوئی بندش نہیں، بلکہ ایک الگ انداز سے جینے اور کچھ نیا کر دکھانے کا نام ہے۔ ہمیں اپنی صلاحیتوں پر بھروسہ رکھنا ہے اور جدید دور کے ساتھ قدم سے قدم ملا کر آگے بڑھنا ہے۔
آخر میں، آپ تمام ساتھیوں کو میرے اور ہمارے CSR Experts پلیٹ فارم کی طرف سے ہیپی وائٹ کین سیفٹی ڈے!
السلام علیکم ورحمۃ اللہ وبرکاتہ، میں آپ سے اجازت چاہتا ہوں، اللہ حافظ!
14 ·