Knowledge Bank 📚

الرسالة دي يمكن تكون أهم من أي فرصة نزلتها على التشانل الفترة الأخيرة بقى فيه شيء منتشر جدًا، وبصراحة لازم أحذركم منه. للأسف، بقى أي شخص فاضي يقرر يعمل "تيم تطوعي"، ويجمع طلاب صغيرين لسه معندهمش خبرة، ويقنعهم إنهم هيستفيدوا، لكن في الحقيقة بيستغلهم. تلاقي المتطوع بدل ما يتعلم أو يساعد الناس، بقى بيشتغل عند الشخص ده مجانًا. واحد يشتغل Marketing. وواحد يكتب Content. وواحد يعمل Scripts. وواحد HR. وواحد PR. وواحد تصميم جرافيك. وواحد مونتاج. وفي الآخر كل الشغل ده بيروح لبناء اسم شخص واحد أو صفحة واحدة، بينما المتطوع مخرجش بأي خبرة حقيقية ولا أثر حقيقي. وكل ده تحت شعار: "هتاخد شهادة." للأسف، ناس كتير بقت تفتكر إن التطوع هدفه الشهادة. وده غلط. التطوع الحقيقي هدفه إنك تساعد الناس، وتخدم المجتمع، وتتعلم، وتبني شخصيتك، وتكتسب خبرات حقيقية، وتعيش مواقف تفتخر بيها طول عمرك. اسأل نفسك... ليه أنا بتطوع؟ هل علشان ورقة؟ ولا علشان أتعلم؟ ولا علشان أساعد ناس محتاجة؟ ولا علشان أطور مهاراتي؟ ولا علشان يبقى عندي تجربة أفتخر بيها؟ لما تروح تقدم على منحة أو تدريب أو وظيفة، والـ HR يسألك: "احكلنا عن تجربتك في التطوع." إيه الأفضل؟ إنك تقول: "كنت بنزل قوافل، أو بساعد في مستشفى، أو دار أيتام، أو جمعية خيرية، أو حملات توعية، أو مبادرات لخدمة المجتمع." ولا تقول: "كنت بمسك صفحة على السوشيال ميديا، وبكتب بوستات، وبجيب ريتش." فرق كبير جدًا. مش بقول إن التسويق أو التنظيم مهارات سيئة، بالعكس هي مهارات ممتازة، لكن لما تكون بتتعلمها في مكان واضح ومحترم، مش لما يتم استغلالك تحت اسم التطوع. ومن أكتر الحاجات اللي بقيت أشوفها كمان، إن فيه ناس بتعمل فعاليات أو Events بدون أي جهة معروفة، ويطلبوا من الطلاب يبيعوا تذاكر أو يجمعوا فلوس أو تبرعات. وده خطر جدًا. لأنك ممكن تتورط قانونيًا في حاجة أنت أصلاً مش فاهمها. ولو لا قدر الله طلع الموضوع نصب، أول ناس هيتحاسبوا هما الشباب اللي كانوا بينزلوا يجمعوا الفلوس. وده حصل بالفعل مع ناس. علشان كده... متخليش حد يستخدمك. ومتخليش حد يضحك عليك باسم الشهادة. ومتخليش حد يقنعك إن استغلالك اسمه تطوع. وبالنسبة للتطوعات الأونلاين... أنا شخصيًا مش بنصح بيها، باستثناء بعض البرامج الدولية المعروفة والمنظمة، واللي غالبًا بتكون موجهة لمن هم فوق 18 سنة. لكن أي تطوع أونلاين مجهول، أو معمول بواسطة أفراد بدون جهة واضحة، لازم تفكر فيه كويس جدًا قبل ما تشارك. وأحب أقولكم كام علامة لو شفتها، راجع قرارك فورًا: - لو المسؤول عن "المؤسسة" مجرد طالب بدون أي جهة رسمية. - لو مفيش مؤسسة أو كيان معروف واقف وراء النشاط. - لو مفيش شفافية، ومحدش بيرد على أسئلتكم. - لو بيجبروكم تعملوا حاجات مش مقتنعين بيها. - لو كل همهم إنكم تجيبوا ناس أو تعملوا Marketing. - لو الشهادة بفلوس. - لو بيطلبوا منكم تجمعوا فلوس أو تبيعوا تذاكر بدون جهة رسمية. - لو حسيت بعدم ارتياح... امشي فورًا. ثق بإحساسك. التطوع الحقيقي عمره ما بيكون قائم على الاستغلال. وفي النهاية... رسالة لكل شخص بيستغل الطلاب باسم التطوع: اتقوا الله. الطلاب بيدخلوا عندكم بحسن نية، وعايزين يتعلموا ويخدموا المجتمع. بلاش تستغلوا أحلامهم، ولا وقتهم، ولا مجهودهم، ولا تعلقوهم بأمل شهادة ملهاش قيمة حقيقية. ابنوا فرق تخدم الناس، مش فرق تخدم أسماءكم. وفي الآخر... أتمنى كل واحد فيكم يختار المكان اللي يضيف له، ويحترمه، ويقدر مجهوده. التطوع من أجمل التجارب اللي ممكن تعيشها في حياتك، فلا تضيعها في مكان غلط. وأخيرًا... شكرًا لكل واحد كان جزء من رحلة القناة. وشكرًا لكل شخص وثق فيا. وربنا يجعل كل فرصة بننزلها سبب في خير ورزق ونجاح ليكم جميعًا.