id 1229194818Файл
Абдунаби ҲАМРО
Хайрли тун, кўнгил уйига
Минг хил орзу, ҳавас тўлганлар,
Хайрли тун, саробни бахт деб
Кун бўйи овора бўлганлар.
Хайрли тун, ўзгалар учун
Ўзлигидан кеча олганлар,
Хайрли тун, ғам шаробини
Иккиланмай ича олганлар.
Хайрли тун, ёш юракларни
Минг тарафга тортган хаёллар,
Хайрли тун, дунё молидан
Ёрин афзал кўрган аёллар.
Алдаганлар ва алданганлар
Хайрли тун, майли, сизга ҳам
Сирлар сотиб, карнай чалганлар
Хайрли тун, эй кўҳна олам.
Шу тун қалбингизни тарк этсин
Бу дунёнинг барча дардлари,
Тўшагида осуда ётсин
Ҳақнинг худо деган мардлари.
Бу тун сирли кеча, ишонинг
Саҳар туринг бахтларга тўлиб,
Тонгда гўдакдай пок уйғонинг
Бугунгидан тозароқ бўлиб.