ՀՀ ԿԳՄՍ նախարարություն / Ministry of ESCS RA

Շիրակի մարզի Անի համայնքի Սառնաղբյուր բնակավայրում տեղի է ունեցել երիտասարդական տարածքի բացման արարողություն, որին մասնակցել և ողջույնի խոսքով հանդես են եկել ԿԳՄՍ նախարարի տեղակալ Քրիստինա Թաթարյանը, Շիրակի մարզպետ Դավիթ Առուշանյանը, Անի համայնքի ղեկավար Արման Սարիբեկյանը և «Երիտասարդական նախաձեռնությունների կենտրոն» ՀԿ նախագահ Արթուր Նաջարյանը: Քրիստինա Թաթարյանը շնորհավորել է երիտասարդական տարածքի բացման կապակցությամբ և ընդգծել, որ ԿԳՄՍ նախարարությունը կարևորում է յուրաքանչյուր համայնքում երիտասարդների ներուժի բացահայտման, զարգացման և սեփական գաղափարների իրականացման հնարավորությունները։ Հաջորդաբար նախարարի տեղակալն այցելել է Ախուրյանի երիտասարդական կենտրոն, ծանոթացել գործունեությանը, ստեղծված պայմաններին և ծրագրերին։ Երիտասարդական տարածքները և կենտրոնները գործում են ԿԳՄՍ նախարարության հաստատած երիտասարդական միջավայրերի գործունեության ուղեցույցի համաձայն։ Ավելին՝ https://escs.gov.am/articles/news/457

ԿԳՄՍ նախարար Ժաննա Անդրեասյանն Ապարանի արվեստի դպրոցում ներկա է եղել եզդիական համայնքին նվիրված «Զինակից քույրեր» ֆիլմի ցուցադրությանը։ Կինոդիտումը կազմակերպվել է ազգային փոքրամասնությունների «Տանիքը՝ Հայաստան» փառատոնի շրջանակում, որն իրականացվում է ԿԳՄՍ նախարարության աջակցությամբ։ Միջոցառմանը ներկա են եղել Արագածոտնի մարզպետ Սերգեյ Մովսիսյանը, Ալագյազի համայնքապետ Ջասմ Մախմուդովը և այլք: ԿԳՄՍ նախարար Ժաննա Անդրեասյանը ողջույնի խոսքում նշել է, որ «Տանիքը՝ Հայաստան» ծրագիրը մեկնարկել է հոկտեմբերի 4-ին՝ Ազգային փոքրամասնությունների օրվա շրջանակում. «Նախաձեռնությունը հնարավորություն է տալիս կինոյի միջոցով ավելի լավ ճանաչելու Հայաստանում բնակվող ազգային փոքրամասնություններին՝ բացահայտելով համայնքների գործունեությունը, ինչպես նաև մեր երկրում ապրող ժողովուրդների պատմությունը, մշակույթը, ինքնությունն ու կենսակերպը։ Առանձնակի կարևորություն ունի ծրագրի ապակենտրոնացված ձևաչափը և մշակութային միջոցառումների կազմակերպումը մարզերում, որը նախարարության ընդհանուր քաղաքականության կարևոր ուղղություններից է»: Ավելին՝ https://escs.gov.am/articles/news/458

Գիտության ոլորտին լրացուցիչ 2 մլրդ 356.9 մլն դրամ ֆինանսավորում կհատկացվի. 12 գիտական կենտրոն կվերազինվի 21 նոր սարքավորմամբ։ Որոշումն ընդունվել է Կառավարության այսօրվա նիստում՝ 2026 թվականի պետական բյուջեի վերաբաշխմամբ։ Հարցը զեկուցել է ԿԳՄՍ նախարար Ժաննա Անդրեասյանը՝ նշելով, որ միջոցները կուղղվեն գիտական կենտրոնների՝ ժամանակակից սարքավորումներով վերազինմանը և գիտական դրամաշնորհային հետազոտությունների ֆինանսավորմանը։ Նա ընդգծել է՝ գիտական ենթակառուցվածքների զարգացումը և գիտահետազոտական ծրագրերի ֆինանսավորումը Կառավարության ռազմավարական առաջնահերթություններից են։ Նախարարի խոսքով՝ 2021 թվականից սկսած՝ գիտական սարքավորումների ձեռքբերման ուղղությամբ իրականացվել են տասնյակ միլիարդավոր դրամների ներդրումներ, որոնց արդյունքում բուհերում և գիտական կազմակերպություններում ձևավորվել են ժամանակակից հետազոտական լաբորատորիաներ. «Այս ներդրումները հնարավորություն են տվել մեր գիտական ինստիտուտներում և բուհերում ձևավորելու լաբորատորիաներ, որոնցում հնարավոր է իրականացնել նորագույն հետազոտություններ։ Այն հետազոտությունները, որոնց համար նախկինում անհրաժեշտ էր դիմել արտերկրի լաբորատորիաներին, այսօր արդեն կարողանում ենք իրականացնել Հայաստանում»։ Վարչապետ Նիկոլ Փաշինյանն ընդգծել է, որ 2018 թվականից ի վեր Հայաստանում գիտության ֆինանսավորումն աճել է՝ գրեթե եռապատկվելով։ Միաժամանակ, նա կարևորել է ֆինանսավորման նման նշանակալի աճի վերաբերյալ հանրային քննարկումներն ու իրազեկումը: Ավելին՝ https://escs.gov.am/articles/news/459

Երևանի Հովհաննես Շարամբեյանի անվան ժողովրդական արվեստների թանգարանում և թանգարանի Դիլիջանի մասնաճյուղում հոկտեմբերի 17-18-ը կանցկացվի «Հայկական ժողովրդական և դեկորատիվ-կիրառական արվեստ» խորագրով գիտաժողովը։ Այն կազմակերպվում է ժողովրդական արվեստի անվանի գործիչ Հովհաննես Շարամբեյանի ծննդյան 100-ամյակին նվիրված միջոցառումների շրջանակում՝ նվիրված ՅՈՒՆԵՍԿՕ-ի Ոչ նյութական մշակութային ժառանգության միջազգային օրվան։ Գիտաժողովը կազմակերպվում է ԿԳՄՍ նախարարության և Հովհաննես Շարամբեյանի անվան ժողովրդական արվեստների թանգարանի կողմից և իրականացվում է «Գրին Ռոք» հիմնադրամի աջակցությամբ։ Ավելին՝ https://escs.gov.am/articles/announcements/460

ԿԳՄՍ նախարար Ժաննա Անդրեասյանն այսօր ընդունել է Հայաստանի Հանրապետությունում Ֆրանսիայի Հանրապետության նորանշանակ արտակարգ և լիազոր դեսպան Ֆլորիան Էսկյուդիեին: Նախարար Ժաննա Անդրեասյանը շնորհավորել է դեսպանին Հայաստանում դիվանագիտական առաքելությունը ստանձնելու կապակցությամբ՝ մաղթելով արդյունավետ և հաջող գործունեություն։ Նա հույս է հայտնել, որ դեսպանի պաշտոնավարման ընթացքում նոր մակարդակի կհասցվի Հայաստանի և Ֆրանսիայի միջև ռազմավարական գործընկերությունը: «Մեր երկրները համագործակցության լայն օրակարգ ունեն, մասնավորապես՝ կրթության, մշակույթի և սպորտի ոլորտներում: ԿԳՄՍ նախարարությունը վերահաստատում է իր պատրաստակամությունը՝ հետևողականորեն զարգացնելու Հայաստան-Ֆրանսիա բազմակողմ համագործակցությունը»,- ասել է նախարարը: Ավելին՝ https://escs.gov.am/articles/news/461

COP17-ի շրջանակում Հայաստան ժամանած Շվեյցարիայի Դաշնային խորհրդի փոխնախագահ, Դաշնային արտաքին գործերի դեպարտամենտի ղեկավար, ԵԱՀԿ գործող նախագահ Իգնացիո Կասիսի գլխավորած պատվիրակությունն այցելել է Մատենադարան։ ԿԳՄՍ նախարարի տեղակալ Քրիստինե Թաթարյանի և Շվեյցարիայի Համադաշնությունում ՀՀ արտակարգ և լիազոր դեսպան Հասմիկ Տոլմաջյանի ուղեկցությամբ Իգնացիո Կասիսը ծանոթացել է Մատենադարանի թանգարանում ներկայացված հայկական ձեռագրական ժառանգության բացառիկ նմուշներին, այցելել Վերականգնման բաժին, կենսաքիմիական հետազոտությունների, ինչպես նաև արաբատառ ձեռագրերի վերականգնման և հետազոտման լաբորատորիաներ։ Ավելին՝ https://escs.gov.am/articles/news/462

Հոկտեմբերի 16-18–ը Հայաստանում կանցկացվի eTwinning համաեվրոպական դպրոցական ծրագրի միջազգային համաժողովը, որին մասնակցում է շուրջ 60 ներկայացուցիչ՝ աշխարհի ավելի քան 10 երկրներից։ Այս տարվա համաժողովի հիմնական թեման է «Ապագայի դպրոցը. ինչպե՞ս պատրաստել սովորողներին անորոշ ու արագ փոփոխվող աշխարհի համար»։ Ողջունելով համաժողովի մասնակիցներին՝ ԿԳՄՍՆ Կրթական տեխնոլոգիաների ազգային կենտրոնի տնօրեն Արտակ Պողոսյանն ընդգծել է eTwinning համայնքին հայաստանյան դպրոցների անդամակցության կարևորությունը՝ միջազգային համագործակցության, փորձի փոխանակման, ժամանակակից մանկավարժական մոտեցումների և կրթության արդիականության տեսանկյունից։ Նշենք, որ 2013 թվականից ի վեր eTwinning համաեվրոպական ծրագրին միացել են ավելի քան 780 հայաստանյան դպրոց և շուրջ 1400 ուսուցիչ։ Ավելի քան 50 ուսուցիչ մասնակցել է միջազգային սեմինարների, տասնյակ ուսուցիչներ հեղինակել և մասնակցել են միջազգային նախագծերի, միջազգային մրցույթի հաղթողներ ճանաչվել։ Ավելին՝ https://escs.gov.am/articles/news/467

ԿԳՄՍ նախարար, Խ. Աբովյանի անվան հայկական պետական մանկավարժական համալսարանի հոգաբարձուների խորհրդի նախագահ Ժաննա Անդրեասյանը բուհում կայացած գիտական խորհրդի արտահերթ նիստում ներկայացրել է համալսարանի ռեկտորի նորանշանակ ժամանակավոր պաշտոնակատար Արաքսիա Սվաջյանին։ Վերջինս այդ պաշտոնում առաջադրվել է ՀՊՄՀ հոգաբարձուների խորհրդի արտահերթ նիստում անցկացված քվեարկության արդյունքներով։ Նախարարը հաջողություն է մաղթել Արաքսիա Սվաջյանին՝ ընդգծելով, որ Մանկավարժական համալսարանը և նախարարությունը շարունակելու են համագործակցել՝ նպատակային թիրախ ունենանալով մանկավարժական կրթության բարելավումն ու ոլորտի բարեփոխումները։ Ժաննա Անդրեասյանն ընդգծել է, որ Արաքսիա Սվաջյանն ունի Մանկավարժական համալսարանում դասախոսական և հետազոտական աշխատանքի երկարամյա փորձ, նախադպրոցական կրթության համակարգում ծավալել է հետազոտական գործունեություն։ ԿԳՄՍ նախարարությունում աշխատելու տարիներին ևս նա շարունակել է կապ պահել համալսարանի հետ՝ դասավանդելով և լինելով հոգաբարձուների խորհրդի անդամ։ Ժաննա Անդրեասյանը միաժամանակ շնորհակալություն է հայտնել Լիլիթ Մկրտչյանին՝ Մանկավարժական համալսարանի համար կարևոր ժամանակահատվածում բուհին միանալու, ճգնաժամային շրջանում բնականոն գործունեությունն ապահովելու համար։ https://escs.gov.am/articles/news/477

Հոկտեմբերի 19–30-ը Կարեն Դեմիրճյանի անվան մարզահամերգային համալիրում COP17-ի «Կանաչ գոտում» ԿԳՄՍ նախարարությունը կներկայացնի առանձին տաղավար։ Համակարգի կազմակերպությունների մասնակցությամբ հանրության համար նախատեսվում են կրթական, մշակութային, երիտասարդական և սպորտային միջոցառումներ։ Տաղավարը բաց կլինի ամեն օր՝ ժամը 10։00–20։00։ «Կանաչ գոտում» ԿԳՄՍՆ տաղավարի միջոցառումների ծրագիրը՝ կայքում ⤵ https://escs.gov.am/articles/news/478

2027 թվականի հուլիսի 23-ից օգոստոսի 1-ը Հայաստանում կայանալու են Ֆրանկոֆոնիայի 10-րդ միջազգային մարզամշակութային խաղերը։ Միջոցառմանն ընդառաջ նախատեսվում է մրցույթների անցկացում՝ տարբեր մշակութային անվանակարգերով։ ԿԳՄՍ նախարարությունը հայտարարում է հայտերի հավաքագրում հետևյալ մշակութային անվանակարգերում․ ✅ Թատրոն ✅ Պար ✅ Երգեցողություն ✅ Լուսանկարչություն ✅ Կերպարվեստ ✅ Քանդակագործություն ✅ Գնդակով աճպարարություն ✅ Գրականություն ✅ Հեքիաթասացություն ✅ Թվային ստեղծարարություն Մրցույթին կարող են մասնակցել 18-35 տարեկան ՀՀ քաղաքացիները։ Հայտերի ներկայացման վերջնաժամկետը 2026 թվականի նոյեմբերի 30-ն է: Յուրաքանչյուր անվանակարգի դիմումի հայտաձևը, ինչպես նաև մասնակցության և ընտրության հստակ պայմանները՝ կայքում ➡️ https://escs.gov.am/articles/announcements/479

ՀՀ կրթության, գիտության, մշակույթի և սպորտի նախարար Ժաննա Անդրեասյանը Բարձրագույն կրթության և գիտության կոմիտեի աշխատակազմին է ներկայացրել ԲԿԳԿ նախագահի նորանշանակ տեղակալ Լիլիթ Մկրտչյանին։ Նախարարը շնորհակալություն է հայտնել ԿԳՄՍ բարձրագույն կրթության և գիտության կոմիտեի նախագահի նախկին տեղակալներ Արտուր Մովսիսյանին և Մկրտիչ Այվազյանին՝ կատարած երկարատև բարեխիղճ աշխատանքի և բարձրագույն կրթության և գիտության բարեփոխումների գործընթացում զգալի ներդրման համար: Ներկայացնելով ԲԿԳԿ նախագահի նոր տեղակալին՝ Ժաննա Անդրեասյանը կարևորել է կրթության, այդ թվում՝ բարձրագույն կրթության կազմակերպման ոլորտում Լիլիթ Մկրտչյանի փորձն ու հմտությունները՝ նրան մաղթելով բեղմնավոր աշխատանք։ ԿԳՄՍ նախարարն անդրադարձել է կոմիտեի համակարգման ոլորտներում նախատեսվող աշխատանքներին և առաջիկա անելիքներին՝ ընդգծելով «Բարձրագույն կրթության և գիտության մասին» նոր օրենքի կիրարկման համար անհրաժեշտ ենթաօրենսդրական իրավական ակտերի մշակումը։ Ավելին՝ https://escs.gov.am/articles/news/480

Հոկտեմբերի 19–30-ը Կարեն Դեմիրճյանի անվան մարզահամերգային համալիրում COP17-ի «Կանաչ գոտում» ԿԳՄՍ նախարարությունը ներկայացնում է առանձին տաղավար։ ԿԳՄՍ նախարար Ժաննա Անդրեասյանը և նախարարի տեղակալ Աննա Բաբաջանյանն այցելել են մարզահամերգային համալիր, շրջել տաղավարներում, ծանոթացել նախագծերին: ԿԳՄՍՆ տաղավարում այսօր ներկայացվում է հանրակրթության ոլորտը: Մասնավորապես՝ «Այբ» դպրոցի աշակերտները նախարարին են ներկայացրել «Գաղափարից՝ կանաչ ազդեցություն․ նախագծային ուսուցումը հանուն բնության և կայուն ապագայի» նախագիծը, իսկ Կրթության զարգացման և նորարարությունների ազգային կենտրոնը՝ ՅՈՒՆԵՍԿՕ-ի ասոցացված դպրոցների աշխատանքները՝ «Կլիմայական արկղիկ» ծրագիրը՝ սովորողների մասնակցությամբ: Նախարար Ժաննա Անդրեասյանը նշել է, որ այս շրջանում, երբ դպրոցական արձակուրդներ են, աշակերտների անելիքները պետք է կենտրոնանան COP17-ի «Կանաչ գոտում» գործող թեմատիկ տաղավարներում ներկայացվող ծրագրերի ուղղությամբ: Ըստ նրա՝ անցկացվող մի շարք միջոցառումներ կրթության առանցքային մաս են, և շատ կարևոր է, որ դպրոցականներն այս ընթացքում ակտիվորեն այցելեն «Կանաչ գոտի», ծանոթանան կենսաբազմազանության խնդիրներին և քնարկվող թեմաներին: Ավելին՝ https://escs.gov.am/articles/news/481

ՀՀ ԿԳՄՍ նախարարության և Բելգիայի Թագավորության Գենտի համալսարանի միջև հեռավար ձևաչափով ստորագրվել է հայագիտական դասընթացներ իրականացնելու մասին փոխըմբռնման հուշագիր: Այն համապատասխանաբար ստորագրել են Բելգիայի Թագավորությունում ՀՀ արտակարգ և լիազոր դեսպան Տիգրան Բալայանը և Գենտի համալսարանի ռեկտոր Պետրա դե Սուտերը: Հուշագրի շրջանակում Գենտի համալսարանում կիրականացվեն Հայաստանի մշակույթի և պատմության դասընթացներ, կկազմակերպվեն աշխատաժողովներ, սեմինարներ, թեմատիկ գիտական օրեր, գործող դասընթացների շրջանակում կմշակվեն ուսումնական մոդուլներ, ինչպես նաև կկազմակերպվեն հայագիտությանը վերաբերող հանրային իրազեկման միջոցառումներ: ԿԳՄՍ նախարարությունը, նպատակ ունենալով խթանել ամբողջ աշխարհում հայագիտության տարածումն ու զարգացումը, համագործակցում է աշխարհի առաջատար համալսարանների հետ՝ ֆինանսավորելով հայագիտական առարկաների՝ հայոց լեզվի, գրականության, պատմության և մշակույթի դասավանդումն ու ուսումնասիրությունը, հետազոտական աշխատանքների կազմակերպումն ու իրականացումը: Ավելին՝ https://escs.gov.am/articles/news/486

ՀՀ կրթության, գիտության, մշակույթի և սպորտի նախարարի տեղակալ Ալֆրեդ Քոչարյանն այսօր ընդունել է The R&A միջազգային կազմակերպության՝ Եվրոպայի տարածաշրջանում գոլֆի զարգացման հարցերով տնօրեն Զոի Թաքերին: Հանդիպմանը մասնակցել է նաև Հայաստանի գոլֆի ասոցիացիայի նախագահ Կարեն Հովհաննիսյանը։ Հանդիպման ընթացքում քննարկվել են Հայաստանում գոլֆի զարգացման հեռանկարները, մարզաձևի մասսայականացման, երեխաների և երիտասարդների ներգրավման, մարզական ենթակառուցվածքների զարգացման, ինչպես նաև միջազգային համագործակցության ընդլայնման հնարավորությունները։ Ավելին՝ https://escs.gov.am/articles/news/487