ပြည်သူမှ ပြည်သူသို့ အလင်းပြ ပေးနေသော 🦅 7 Star Myaing 🦅

မြိုင်တွင် စစ်တပ်က ဘောင့်ဘင်ရွာကို မီးရှို့ဖျက်ဆီး၊ ကနီရှိ ယာကြီးရွာကိုလည်း စစ်တပ်က ဗုံးကျဲမှု ပြည်သူ ၁ ဦးသေဆုံး ဩဂုတ်လ ၂ ရက် မကွေးတိုင်း၊ မြိုင်မြို့နယ် အနောက်ပိုင်းရှိ ဘောင့်ဘင်ကျေးရွာကို အကြမ်းဖက် စစ်တပ်က ယနေ့ ဩဂုတ်လ ၂ ရက်နေ့ နံနက်ပိုင်းတွင် မီးရှို့ဖျက်ဆီးခဲ့ကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။ မြိုင်မြို့နယ်အနောက်ပိုင်း ဘောင့်ဘင်ကျေးရွာတွင် ရောက်ရှိနေသော အကြမ်းဖက် စစ်တပ် စစ်ကြောင်းသည် ယနေ့ နံနက် ၁၀ နာရီခန့်တွင် ကျေးရွာအတွင်းရှိ နေအိမ်များကို မီးရှို့ဖျက်ဆီးခဲ့ခြင်း ဖြစ်သည်။ ထို့နောက် အဆိုပါ စစ်ကြောင်းနှင့် ယာဉ်တန်းသည် မွန်းလွဲ ၁၂ နာရီခန့်တွင် ယာကြီးပြင်ကျေးရွာအတွင်းသို့ ဝင်ရောက်တပ်စွဲထားဆဲဖြစ်ကြောင်း သိရသည်။ "စစ်ခွေး စစ်ကြောင်းက ဘောင့်ဘင်ကျေးရွာက မထွက်ခင်မှာ ရွာထဲက နေအိမ်တွေကို မီးရှို့ဖျက်ဆီးခဲ့တာလို့ သိရတယ်။ ပြည်သူတွေလည်း ဆက်လက် တိမ်းရှောင်နေရတုန်းပါပဲ" ဟု ဒေသပြည်သူတစ်ဦးက ပြောဆိုသည်။ ထိုစစ်ကြောင်းသည် ဩဂုတ်လ ၁ ရက်နေ့ကလည်း မြိုင်မြို့နယ်၊ သင်းမကျေးရွာအတွင်း ရက်သတ္တ နှစ်ပတ်နီးပါး ကြာ ဝင်ရောက်တပ်စွဲကာ ပြည်သူ့နေအိမ် ၃၅ လုံးကို မီးရှို့ဖျက်ဆီးပြီး ပြည်သူပိုင်ပစ္စည်းများကိုလည်း ဖောက်ထွင်းလိုယူဖျက်ဆီးသွားကြောင်း သိရသည်။ ထို့ပြင် စစ်ကိုင်းတိုင်း၊ ကနီမြို့နယ်၊ မုံရွာ-ယာကြီး-ကလေးဝ ကားလမ်းဘေးတွင်ရှိသော ယာကြီးကျေးရွာကိုလည်း အကြမ်းဖက်စစ်ကောင်စီတပ်က ဩဂုတ်လ ၁ ရက်နေ့ တွင် လေကြောင်းဖြင့် ဗုံးကျဲ တိုက်ခိုက်ခဲ့သောကြောင့် ပြည်သူ ၁ ဦးသေဆုံးခဲ့ကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။ အဆိုပါ လေကြောင်းတိုက်ခိုက်မှုကြောင့် နေအိမ်များနှင့် မော်တော်ယာဉ်မား ထိမှန်ပျက်စီးခဲ့သည့်အပြင် ပြည်သူ ၁ ဦး သေဆုံးကာ ၁ ဦး ထိခိုက်ဒဏ်ရာရရှိခဲ့ကြောင်း သိရသည်။ "စစ်ခွေး‌တွေ ဗုံးကျဲ တိုက်ခိုက်သွားတာ ပြည်သူ ၁ ဦး သေဆုံးပြီး တော့ ၁ ဦး ထိခိုက်ဒဏ်ရာရပါတယ်" ဟု ဒေသပြည်သူတစ်ဦးက ပြောဆိုသည်။ စစ်ကောင်စီ၏ လေကြောင်းတိုက်ခိုက်မှုနှင့် စစ်ကြောင်းထိုးမှုများကြောင့် ကနီမြို့နယ် အတွင်းရှိ ဒေသပြည်သူများမှာ ဘေးလွတ်ရာသို့ အရေးပေါ် ထွက်ပြေးတိမ်းရှောင်နေကြရကြောင်း သိရသည်။ #KTM #HlaingInfo