ግዜ እና ትንፋሹ💡🖌

ሀብትና ስልጣን በሰው ልጅ ህሊና ላይ የሚያሳድሩት ተፅዕኖ በታሪክም ሆነ በስነ-ልቦና እጅግ አነጋጋሪ ከሆኑ ጉዳዮች መካከል አንዱ ነው። ሰው በሌለውና አቅም ባጣበት ወቅት ለፈጣሪው ቅርብ፣ ለሰው ልጅም አዛኝና ሩሩህ ሆኖ መኖር የተለመደ ነው። ሆኖም ግን የቆመበት ምድር ተቀይሮ የቁሳቁስና የገንዘብ አቅም ሲያገኝ፣ ፈጣሪውን የመርሳትና ምስኪኑን የማንኳሰስ አዝማሚያ በስፋት ይስተዋላል። ይህ ለውጥ የሚመነጨው በሀብት ምክንያት ከሚፈጠር የ"እኔነት" እና የ"ሉዓላዊነት" የሃሰት ስሜት (Illusion of Self Sufficiency) ነው። ገንዘብ ጊዜያዊ የደህንነት ጋሻ ስለሚሆንለት፣ ሰውየው ሁሉንም ነገር ያሳካው በገዛ ጥበቡና ጉልበቱ እንደሆነ ማመን ይጀምራል። በዚህም ምክንያት በችግር ጊዜ ይማጸነው የነበረውን ፈጣሪ ከመዘንጋት አልፎ፣ እጣ ፈንታ ያልቀናቸውን ምስኪኖችን እንደ ሰነፍና አቅመ-ቢስ አድርጎ በመመልከት ይጨቁናቸዋል። ይህ የሰው ልጅ የተዛባ ስነ-ልቦና እና የባለጉልቤነት ትዕቢት በኪነ-ጥበብ ውስጥም ትልቅ ትኩረት ተሰጥቶት እናገኘዋለን ድምጻዊ ቴዲ አፍሮ በሙዚቃው "ማርኮ መማር ነበር የጀግና ሞገሱ" በማለት ያስቀመጠው ስንኝ የዚህን የባለጉልቤነት ልክና የእውነተኛ ጀግንነትን ምንነት ቁልጭ አድርጎ የሚያሳይ ማሳያ ነው። እውነተኛ ጥንካሬና ጀግንነት የሚለካው ደካማን በማንበርከክ ወይም ምስኪኑ ላይ አቅምን በማሳየት ሳይሆን፣ የመጨቆንና የማጥፋት ሙሉ ጉልበት እያለህ "የምህረትና የማስተማር" ምርጫን ስትከተል ነው። አቅምን ተገን አድርጎ ምስኪኑን መርገጥና መብቱን መንጠቅ የውስጥ ስብራትንና የሞራል ዝቅጠትን የሚያመለክት የፈሪነት ተግባር እንጂ የጀግንነት መገለጫ ሊሆን አይችልም። የቁሳቁስ መበልጸግ የውስጥ ማንነትንና ህሊናን እንዲበክል መፍቀድ ታላቅ ውድቀትን ይወልዳል። ታሪክ ደጋግሞ እንዳረጋገጠው፣ አቅም በሌለው ምስኪን ላይ የሚገተር ባለጉልቤ የቆመበት መሰረት አሸዋ በመሆኑ ውድቀቱ የከፋ ይሆናል። የሰው ልጅ እውነተኛ ሞገስና ልዕልና የሚለካው ባገኘው ሀብትና ስልጣን ልክ ለፈጣሪው የሚያሳየው ትህትና እና ለደካሞች የሚዘረጋው የርህራሄ እጅ ሲኖር ብቻ ነው። "ቻው ሰኔ " ፍትህ ከጥግ እስከ ጥግ ይጣራል! መልካም ግዜ

https://t.me/litjournalism/129379 ሐምሌን በማለዳ የሩሲያው ታላቅ ፈላስፋ ፊዮዶር ዶስቶየቭስኪ “ከሁሉ የከፋው የባርነት አይነት በሌሎች የመረዳት ጉጉት ነው” ሲል ብዙዎቻችን እንደ በጎ ምግባር የምናየውን “ተረዱኝ” ባይነትን ወደ ረቂቅ የስነ-ልቦና ወጥመድነት ይቀይረዋል። በአሁኑ ዘመን በተለይም ማህበራዊ ሚዲያ እና የሰዎች ይሁንታ (validation) ህይወታችንን በገዙበት አለም ይህ አባባል ከመቼውም ጊዜ በላይ ትልቅ ትርጉም አለው። አንድ ሰው “እባካችሁ እኔንና ሃሳቤን ተረዱልኝ” ብሎ ሲማጸን በተዘዋዋሪ ለሰዎቹ የሚሰጣቸው መልዕክት፡ “የእኔ የመረጋጋት የመደሰትና የራሴን ዋጋ የመወሰን ስልጣን በእናንተ እጅ ነው” የሚል ነው። ይህ ደግሞ በራስህ ላይ የምታውጀው ትልቁ የውስጥ መፈንቅለ-መንግስት ነው። ሰዎች ካልተረዱህ ትበሳጫለህ፣ ካጣጣሉህ ትከፋለህ፣ ካደነቁህ ትቦርቃለህ። በዚህ ጊዜ አንተ የራስህ ህይወት መሪ ሳትሆን የሰዎች ስሜትና አስተያየት እንደፈለገ የሚነዳህ “የስሜት ተላላኪ” (emotional puppet) ትሆናለህ። በታሪክ ውስጥ ትልልቅ ለውጥ ያመጡ ሳይንቲስቶች፣ ጸሐፊዎች፣ መሪዎችና የጥበብ ሰዎች በዘመናቸው በነበሩ ሰዎች አልተረዱም። እንዲያውም በአብዛኛው እንደ እብድ ነበር የሚታዩት። ልዩነቱ እዚህ ላይ ነው ያልበሰለው ሰው ሳይረዱት ሲቀሩ “እባካችሁ ተረዱኝ” እያለ ይማጸናል፤ እውነተኛው ጀግና ግን አለመረዳቱን እንደ ልዩነቱ መገለጫ (uniqueness) ይቀበለዋል። አለም የአንተን ጥልቀት ማየት ስላልቻለች ብቻ የአንተን ወርቅነት ወደ ናስ ልትቀይረው አትችልም። ስለዚህ አለመረዳትን እንደ ውድቀት ሳይሆን ከሰፊው ህዝብ የተለየ መንገድ እየተጓዝክ መሆንህን ማረጋገጫ አድርጎ መውሰድ የነጻነት መጀመሪያ ነው። በሰዎች መካከል በምትኖርበት ማህበራዊም ሆነ ሙያዊ ህይወት ውስጥ እያንዳንዱን እርምጃህንና ውስጣዊ አላማህን ለሰዎች ለማስረዳት መሞከር ጉልበትን በከንቱ ማባከን ነው። ቁም ነገሩ አለም ሁሉ አጨበጨበልህ ወይም ተረዳህ ላይ አይደለም። እውነተኛው ነጻነት የሚጀምረው ፈጣሪህ ያወቀህን ያህል ብቻ በቂ እንደሆነ ተረድተህ የሰዎችን የይሁንታ ሰንሰለት በጥሰህ በራስህ እውነት ላይ ስትቆም ነው። አለም ባይረዳህ እንኳ አንተ ራስህን እና የቆምክበትን አላማ በሚገባ ካወቅኸው አንተ ቀድሞውኑ ነጻ ወጥተሃል። እውነተኛ ነጻነት የሚጀምረው ሰው በራሱ ማንነትና በፈጣሪው ፊት ሙሉ በሙሉ ሲረካና ሲረጋጋ ነው። ሐምሌያችን እንኳን ደህና መጣሽ! መልካም ግዜ!

"ጥንካሬን ጠየቅህ፤ የበለጠ ጠንካራ እንድትሆን ግን ፈተናዎች ተሰጡህ። መልካም አስተሳሰብን ጠየቅህ፤ የራስህን ብርሃን እንድታገኝ ግን ወደ ጨለማ ውስጥ ተወረወርህ። ታያለህ አይደል? እያንዳንዱ ነገር የራሱ ዓላማ አለው፤ ስለዚህ ራስህን በማሻሻል ላይ ብቻ ትኩረት አድርግ። ልታደርገው የምትችለው ብቸኛው ነገር እሱ ብቻ ነው።" From house of david

🌿❤️ እንኳን ለ2019 ዓ.ም አዲስ ዓመት በሰላም አደረሳችሁ! ❤️🙏 አዲስ ዓመት… አዲስ ቀን… አዲስ ተስፋ… 🌅 ያለፈውን ዓመት ስንመለከት የምናስታውሳቸው ብዙ ነገሮች አሉ። የሳቅንባቸው ቀናት፣ የተከዝንባቸው ሰዓቶች፣ ያልተሳኩልን ነገሮች፣ ያላሰብናቸው ፈተናዎች… እንዲሁም በጸጋው ያለፍንባቸው ብዙ ጊዜያት። ነገር ግን ዛሬ አንድ ነገር አንርሳ፤ እስከዚህ ያደረሰን እግዚአብሔር ነው። 🙏 ሰዎች ሊተዉን ይችላሉ፣ እቅዶቻችን ሊሰናከሉ ይችላሉ፣ አንዳንድ በሮችም ሊዘጉብን ይችላሉ። ነገር ግን የማይተወንና የማይረሳን አምላክ አለን። ❤️ ስለዚህ 2019ን በፍርሃት ሳይሆን በእምነት እንጀምር። በጭንቀት ሳይሆን በጸሎት። በተስፋ መቁረጥ ሳይሆን በተስፋ። በቂም ሳይሆን በይቅርታ። በጥላቻ ሳይሆን በፍቅር። ❤️ የምትጠብቀው መልስ ካልመጣ፣ ጸሎትህን አታቁም። የምትፈልገው በር ካልተከፈተ፣ እምነትህን አትጣል። ምክንያቱም እግዚአብሔር የዘጋው በር ሁሉ ከእሱ የተሻለ ዕቅድ ስላለ ሊሆን ይችላል። 🙏 📖 “እነሆ፥ አዲስ ነገር አደርጋለሁ፤ አሁን ይበቅላል፤ አታውቁትምን?” — ኢሳይያስ 43፥19 2019 ዓ.ም የተሰበረ ልብ የሚጠገንበት፣ የጠፋ ተስፋ የሚመለስበት፣ የቆመ ነገር የሚንቀሳቀስበት፣ የተዘጋ መንገድ የሚከፈትበት፣ እና ከእግዚአብሔር ጋር የምንቀርብበት ዓመት ይሁን። ❤️🙏 እግዚአብሔር በቤታችሁ ሰላምን፣ በልባችሁ ደስታን፣ በሕይወታችሁ በረከትን፣ በሥራችሁ ስኬትን፣ በጉዟችሁ መሪነቱን ይስጣችሁ። 🙏❤️ ለእናንተና ለምትወዷቸው ሰዎች ሁሉ፣ 🌸 መልካም፣ የተባረከና የሰላም 2019 ዓ.ም ይሁን! 🌸 እንኳን አደረሳችሁ! ❤️🙏 ከ ዳዊት ጋሻው

የምድር ጌጥ ኢትዮጵያ፡  የትውልድ ቅብብል እና የታሪክ ውበት በሐመረ ብርሃን የቤተክርስቲያን ተስፋዎችና የእግዚአብሔር ድንቅ ስጦታዎች የሆኑት ህፃናት የአባቶቻቸውን አሰረ ፍኖት፣ የሀገራቸውን ገናና ታሪክ እና የማንነታቸውን መሰረት የሚጨብጡበት ልዩ አገራዊና መንፈሳዊ ኩነት።  ሐመረ ብርሃን ያዘጋጀው "የምድር ጌጥ ኢትዮጵያ" የተሰኘው ታላቅ ዓውደ ርዕይ ታሪክን ከነባህሉ፣ እምነትን ከነቅርሱ ለወጣቱ ትውልድ በግልፅ የሚያስተላልፍ ድልድይ ሆኖ ቀርቦ ነበር። በሆላንድ ፓርክ የተካሄደዉ  ዓውደ ርዕይ ልጆች ብቻ ሳይሆን ለሌሎችም የዕድሜ ክልሎች የኢትዮጵያን ድንቅ ማንነትና የታሪክ ሰበዝ በአካል ተገኝተው ያዩበት፣ የተማሩበትና የአባቶቻቸውን አደራ የተረከቡበት ልዩ አጋጣሚ እንደነበር የብዙዎች ምስክርነት ነው። በዕለቱ በሌላ መድረክ የሥራ ባልደረባችን እንዲሁም የዓውደ ርዕዩ አስጎብኚ ከነበሩት የህዝብ ግኑኝነት ክፍል ሙያዊ ማብራሪያ ከመግቢያው ጀምሮ እስከ ማጠቃለያው ድረስ የተመለከትናቸው ሁነቶች ልብን የሚመስጡና ከህሊና የማይጠፉ ነበሩ። በዓውደ ርዕዩ መግቢያ ላይ የሚገኘው ረጅም ቢልቦርድ ታሪክን ከቅርብ ጊዜ ሁነቶች ጀምሮ ወደ ኋላ ወደ ጥንቱ በመቁጠር ህፃናትና ወጣቶች ከሚያውቁትና ከቅርቡ ዘመን ተነስተው ደረጃ በደረጃ ወደ ጥንታዊውና ገናናው የአባቶቻቸው ታሪክ በጥበብ እንዲጓዙና የታሪኩን ሰበዝ በቀላሉ እንዲረዱ ለማስቻል የታለመ ይመስላል። ከመግቢያው በመቀጠል ንግሥተ ሳባ ታቦተ ጽዮንን በጥበብ ይዛ ስታመጣ ቀይ ባህር እንደተከፈለላቸው የሚዘክረው ማለፊያ ግሩም እና አዲስ መረጃ ሰጪ ሁኖ ያገኘውበት፣ የባኮስ ሰረገላ፣ አክሱም ሀውልት፣ቅዱሳት መጻሕፍት የተሳቱ ቅዱሳን አምሳለ ዋሻዎችና ታሪክ ፣ አባቶቻችን በሰም ቅርፅ በማውጣት ልዩ ልዩ የብረት ቅርፆችን ይሰሩ እንደነበርና ከበሬና ፍየል ቆዳ ብራና ፍቀው መጻሕፍትን በማዘጋጀት ያሳዩት የዕደ-ጥበብና የቴክኖሎጂ እውቀት እና የአምሳለ ላሊበላ ሕንፃ ጥበብ ፣የቅዱስ ያሬድ የዜማ ሀብት በተጨማሪም የነገረ-መለኮትና የድርሰት አባታችን አባ ጊዮርጊስ ዘጋስጫ አሰር ልብን የሚመስጡ ነበሩ። ታድያ ይህ ሁሉ የታሪክ ነገራ ብቻ ሳይሆን ምን እንደሚመስሉም በንድፍ ደረጃ መቀመጣቸው ለጎብኚው በአካል ቦታው ላይ የተከሰተ ያህል ድባብን ያላብሳል። በጉብኝቱ ማጠቃለያና መውጫ አካባቢ ደግሞ ቤተ ክርስቲያኗ በየዘመናቱ ያለፈችበትንና ይደርስባት የነበረውን መከራና ፈተና እንዲሁም የጽናቷን ታሪክ የሚያሳይ ቦታ መኖሩ የጉብኝቱን መንፈሳዊና ታሪካዊ ሚዛን ሙሉ አድርጎታል። እንዲህ ያሉ ጉዳዮች ይበል የሚያስብሉ እና በተለይ አሁን እንዳለንበት ዘመን ከቦታ ቦታ ተዘዋዎሮ ጥንታዊ ቦታዎችን ለመሳለም አስቸጋሪ በሆነበት ሰዓት አንድ ቦታ ላይ ሰዉን ስለቤተክርስቲያኗ ከፍተኛ እውቀት እሚያስጨብጡ ስለሆኑ በርቱልን እንላለን! https://t.me/beensurvival/400